ਇਸ ਤਰ੍ਹਾਂ ਲੱਗਦਾ ਹੈ ਕਿ ਹੁਣੇ ਹੀ ਸਾਲ ਚੜ੍ਹਿਆ ਸੀ ਤੇ ਹੁਣੇ ਹੀ ਬੀਤ ਗਿਆ। ਅਸੀਂ ਅਕਸਰ ਕਹਿੰਦੇ ਹਾਂ ਕਿ ਸਮਾਂ ਕਿੰਨੀ ਤੇਜ਼ੀ ਨਾਲ਼ ਬੀਤਦਾ ਪ੍ਰਤੀਤ ਹੁੰਦਾ ਹੈ। ਅਸਲ ਵਿੱਚ ਸਮੇਂ ਦੀ ਰਫ਼ਤਾਰ ਤਾਂ ਆਦਿ ਤੋਂ ਹੀ ਉਹੀ ਹੀ ਹੈ। ਇਹ ਰਫ਼ਤਾਰ ਤੇਜ਼ ਤੇ ਮੱਧਮ ਮਨੁੱਖ ਦੀਆਂ ਖੁਸ਼ੀਆਂ-ਗਮੀਆਂ, ਦੁੱਖ-ਸੁੱਖ, ਸਫਲਤਾ-ਅਸਫਲਤਾ ਆਦਿ 'ਤੇ ਨਿਰਭਰ ਕਰਦੀ ਹੈ। ਜਦੋਂ ਇਨਸਾਨ ਖੇੜੇ ਵਿੱਚ ਹੁੰਦਾ ਹੈ ਤਾਂ ਉਸ ਨੂੰ ਇੰਝ ਲੱਗਦਾ ਹੈ ਕਿ ਸਮਾਂ ਬੜੀ ਤੇਜ਼ੀ ਨਾਲ਼ ਨਿਕਲਦਾ ਜਾ ਰਿਹਾ ਹੈ ਇਸ ਦੇ ਉਲਟ ਜੇਕਰ ਮਨੁੱਖ ਕਿਸੇ ਮੁਸੀਬਤ ਵਿੱਚੋਂ ਗੁਜ਼ਰ ਰਿਹਾ ਹੋਵੇ ਤਾਂ ਸਮੇਂ ਦੀ ਰਫ਼ਤਾਰ ਉਸਨੂੰ ਬੜੀ ਧੀਮੀ ਬੀਤਦੀ ਪ੍ਰਤੀਤ ਹੁੰਦੀ ਹੈ।

ਵੀਹ ਸੌ ਚੌਵੀ ਨੇ ਹੁਣ ਆਪਣੀ ਵਾਗਡੋਰ ਵੀਹ ਸੌ ਪੰਝੀ ਨੂੰ ਸੌਂਪ ਦਿੱਤੀ ਹੈ ਪਰ ਇਸ ਬੀਤੇ ਦੀ ਝੋਲ਼ੀ ਬਹੁਤ ਸਾਰੇ ਖੱਟੇ ਮਿੱਠੇ ਤਜ਼ਰਬਿਆਂ ਨਾਲ਼ ਭਰੀ ਹੋਈ ਹੈ। ਬਹੁਤਿਆਂ ਨੂੰ ਇਸ ਸਮੇਂ ਦੌਰਾਨ ਅਪਾਰ ਸਫ਼ਲਤਾਵਾਂ ਪ੍ਰਾਪਤ ਹੋਈਆਂ ਹੋਣਗੀਆਂ ਅਤੇ ਨਵੇਂ ਦਿਸਹੱਦੇ ਸਥਾਪਤ ਕੀਤੇ ਹੋਣਗੇ। ਸਫ਼ਲਤਾ ਇਨਸਾਨ ਦੀ ਮਿਹਨਤ,ਲਗਨ ਤੇ ਦ੍ਰਿੜ ਸੰਕਲਪ ਦਾ ਨਤੀਜਾ ਹੁੰਦੀ ਹੈ ਜੋ ਸਮੇਂ ਦਾ ਸਦਉਪਯੋਗ ਕਰਦੇ ਹਨ ਉਹ ਮਿਥੇ ਟੀਚਿਆਂ ਨੂੰ ਹਾਸਲ ਕਰ ਲੈਂਦੇ ਹਨ ਕਿਉਂਕਿ ਸਮੇਂ ਦਾ ਇੱਕ ਇੱਕ ਪਲ ਕੀਮਤੀ ਹੁੰਦਾ ਹੈ ਜਿਸ ਨੇ ਇਸ ਨੂੰ ਸਮਝ ਲਿਆ ਤੇ ਇਸ ਦਾ ਸਹੀ ਉਪਯੋਗ ਕਰ ਲਿਆ ਉਸ ਨੇ ਹੀ ਮਨਚਾਹਿਆ ਫ਼ਲ ਪ੍ਰਾਪਤ ਕਰ ਲਿਆ। ਦੂਸਰੇ ਪਾਸੇ ਜੋ ਇਨਸਾਨ ਆਪਣੇ ਆਲਸੀ ਸੁਭਾਅ ਸਦਕੇ ਕੁੱਝ ਕਰ ਨਹੀਂ ਪਾਉਂਦੇ ਉਹ ਸਿਰਫ਼ ਸਮੇਂ ਨੂੰ ਕੋਸਦੇ ਹੀ ਨੇ ਕਿ ਅਜੇ ਸਮਾਂ ਹੀ ਮਾੜਾ ਚੱਲ ਰਿਹਾ ਹੈ ਨਹੀਂ ਤਾਂ ਇੰਝ ਨਹੀ,ਇੰਝ ਕਰ ਲੈਂਦੇ। ਕਰਨਾ-ਕੁਰਨਾ ਅਜਿਹੇ ਬੰਦਿਆਂ ਨੇ ਕੁੱਝ ਨਹੀਂ ਹੁੰਦਾ ਉਨ੍ਹਾਂ ਕੋਲ਼ ਸਿਰਫ਼ ਗੱਲਾਂ ਹੀ ਹੁੰਦੀਆਂ ਹਨ। ਆਲਸ ਤਿਆਗ ਕੇ, ਕਰੜੀ ਘਾਲਣਾ ਨਾਲ਼ ਹੀ ਸਹੀ ਰਸਤਾ ਮਿਲਦਾ ਹੈ ਫਿਰ ਹੀ ਬੰਦਾ ਮਿਥੀ ਹੋਈ ਮੰਜ਼ਲ 'ਤੇ ਪਹੁੰਚ ਸਕਦਾ ਹੈ। ਸਿਆਣੇ ਕਹਿੰਦੇ ਹਨ ਕਿ ਚੱਲਿਆਂ ਹੀ ਰਸਤੇ ਬਣਦੇ ਹਨ, ਖੜ੍ਹਿਆਂ ਕੋਈ ਆਪਣੀ ਮੰਜ਼ਿਲ 'ਤੇ ਨਹੀਂ ਪਹੁੰਚ ਸਕਦਾ, ਪਹੁੰਚਣ ਲਈ ਪੈਰ ਪੁੱਟਣਾ ਪੈਣਾ ਹੈ।

ਅਸੀਂ ਨਵੇਂ ਵਰ੍ਹੇ ਦੀ ਗੱਲ ਕਰ ਰਹੇ ਸੀ। ਨਵੇਂ ਵਰ੍ਹੇ ਦੀ ਆਮਦ ਹੋ ਗਈ ਹੈ। ਸਾਡਾ ਆਪਣੇ ਲਕਸ਼ ਤੱਕ ਨਾ ਪਹੁੰਚ ਸਕਣਾ ਤੇ ਉਹ ਕੰਮ ਜੋ ਬੀਤੇ ਵਿੱਚ ਸਾਡੇ ਤੋਂ ਕਰਨੋਂ ਰਹਿ ਗਏ ਸਨ। ਹੁਣ ਤੋਂ ਹੀ ਉਨ੍ਹਾਂ ਨੂੰ ਸਪਸ਼ਟ ਕਰ ਲੈਣਾ ਚਾਹੀਦਾ ਹੈ ਤੇ ਇਨ੍ਹਾਂ ਨੂੰ ਪੂਰਾ ਕਰਨ ਤੇ ਹਾਸਲ ਕਰਨ ਲਈ ਜੀ ਤੋੜ ਮਿਹਨਤ ਕਰਨ ਦਾ ਪੱਕਾ ਨਿਸ਼ਚਾ ਕਰ ਲੈਣਾ ਚਾਹੀਦਾ ਹੈ।

ਨਵਾਂ ਵਰ੍ਹਾ ਸਾਡੇ ਲਈ ਨਵੀਂ ਰੌਸ਼ਨੀ, ਨਵੀਆਂ ਸੰਭਾਵਨਾਵਾਂ ਲੈ ਕੇ ਆਇਆ ਹੈ। ਹੁਣ ਇਹ ਸਾਡੇ 'ਤੇ ਨਿਰਭਰ ਹੈ ਕਿ ਅਸੀਂ ਸੰਭਾਵਨਾਵਾਂ ਨੂੰ ਆਪਣੀ ਸਫਲਤਾ ਵਿੱਚ ਕਿਵੇਂ ਬਦਲਣਾ ਹੈ। ਕਿਵੇਂ ਆਪਣੇ ਜੀਵਨ ਦੀ ਗੱਡੀ ਨੂੰ ਸਹੀ ਲੀਹ 'ਤੇ ਲਿਆਉਣਾ ਹੈ ਅਤੇ ਟਰੈਕ 'ਤੇ ਕਿਵੇਂ ਰਫ਼ਤਾਰ ਫੜਨੀ ਹੈ ਇਹ ਇਨਸਾਨ ਦੀ ਸਮਝ ਉੱਤੇ ਹੈ। ਇੱਕ ਗੱਲ ਹੋਰ ਜੋ ਸਾਨੂੰ ਸਮਝ ਲੈਣੀ ਚਾਹੀਦੀ ਹੈ ਕਿ ਬੀਤੇ ਸਮੇਂ ਜਿਹੜੇ ਮੌਕਿਆਂ ਨੂੰ ਅਸੀਂ ਫੜ ਨਹੀਂ ਪਾਏ,ਜਿਹੜੀਆਂ ਗ਼ਲਤੀਆਂ ਕਾਰਨ ਸਫ਼ਲ ਨਹੀਂ ਹੋ ਪਾਏ, ਉਨ੍ਹਾਂ ਦਾ ਵਿਸ਼ਲੇਸ਼ਣ ਜ਼ਰੂਰ ਕਰਨਾ ਚਾਹੀਦਾ ਹੈ। ਸਾਰੇ ਆਪਣੇ ਜੀਵਨ ਨੂੰ ਖੁਸ਼ਹਾਲ ਬਣਾਉਣਾ ਚਾਹੁੰਦੇ ਹਨ ਪਰ ਇਸ ਲਈ ਕੁੱਝ ਨਿਯਮਾਂ ਦਾ ਪਾਲਣ ਕਰਨਾ ਪੈਣਾ ਹੈ। ਅਨੁਸ਼ਾਸਨ,ਸਮੇਂ ਦੀ ਪਾਬੰਦਗੀ, ਈਮਾਨਦਾਰੀ, ਸਚਾਈ, ਮਿਹਨਤ ,ਲਗਨ , ਦ੍ਰਿੜ ਇਰਾਦੇ, ਹਿੰਮਤ, ਉੱਦਮ,ਹੌਸਲਾ ਆਦਿ ਨਾਲ਼ ਆਪਣੇ ਆਪ ਨੂੰ ਨਿਯਮਬੱਧ ਕਰਨਾ ਪੈਣਾ ਹੈ। ਸਭ ਤੋਂ ਪਹਿਲਾਂ ਅਸੀਂ ਵਿਦਿਆਰਥੀ ਵਰਗ ਦੀ ਗੱਲ ਕਰਦੇ ਹਾਂ ਜੋ ਸਾਡੇ ਦੇਸ਼ ਦਾ ਭਵਿੱਖ ਹੈ। ਸਾਲਾਨਾ ਇਮਤਿਹਾਨਾਂ ਲਈ ਬਹੁਤ ਘੱਟ ਸਮਾਂ ਬਚਿਆ ਹੈ। ਆਪਣੇ ਇਸ ਰਹਿੰਦੇ ਸਮੇਂ ਦੇ ਹਰ ਪਲ ਨੂੰ ਆਪਣੀ ਪੜ੍ਹਾਈ ਲਈ ਲਗਾ ਦੇਣ ਤਾਂ ਕਿ ਆਪਣੀ ਮਿਹਨਤ ਤੇ ਈਮਾਨਦਾਰੀ ਦੇ ਸੁਮੇਲ ਦੇ ਸਦਕਾ ਵਧੀਆ ਨਤੀਜੇ ਹਾਸਲ ਹੋ ਸਕਣ। ਜੇ ਚੰਗੇ ਨਤੀਜੇ ਪ੍ਰਾਪਤ ਹੋਣਗੇ ਤਾਂ ਹੀ ਤੁਹਾਡੇ ਲਈ ਇਹ ਸਾਲ ਅਸਲ ਅਰਥਾਂ ਵਿੱਚ ਨਵਾਂ ਸਾਲ ਹੋਵੇਗਾ।

ਅਗਲੀ ਗੱਲ ਅਸੀਂ ਸਾਰੇ ਆਪਣੀ ਕਰਾਂਗੇ। ਅਸੀਂ ਆਪਣੀ ਜ਼ਿੰਦਗੀ ਵਿੱਚ ਕਿੰਨੇ ਕੁ ਸੁਹਿਰਦ ਰਹੇ ਹਾਂ, ਕਿੰਨੀ ਈਮਾਨਦਾਰੀ ਨਾਲ਼ ਆਪਣੇ ਫਰਜ਼ ਨਿਭਾਏ ਹਨ। ਕਿੱਥੇ-ਕਿੱਥੇ ਕਿੰਨੀ-ਕੁ ਬੇਈਮਾਨੀ,ਚਾਹੇ ਉਹ ਸਮੇਂ ਦੀ ਹੋਵੇ, ਧਨ ਦੀ ਹੋਵੇ ਜਾਂ ਰਿਸ਼ਤੇ ਨਿਭਾਉਣ ਦੀ ਹੋਵੇ, ਕੀਤੀ ਹੈ। ਸਾਨੂੰ ਇਸ 'ਤੇ ਵੀ ਵਿਚਾਰ ਕਰਨੀ ਪਵੇਗੀ।

ਜੋ ਸਮੇਂ ਦੀ ਨਬਜ਼ ਪਛਾਣਦੇ ਹਨ ਤੇ ਸਮੇਂ ਦੀ ਡੋਰ ਨੂੰ ਫ਼ੜਕੇ ਚੱਲਣ ਦਾ ਵਲ ਜਾਣ ਲੈਂਦੇ ਹਨ ਉਨ੍ਹਾਂ ਨੂੰ ਅੱਗੇ ਵਧਣ ਅਤੇ ਤਰੱਕੀ ਕਰਨ ਤੋਂ ਕੋਈ ਨਹੀਂ ਰੋਕ ਸਕਦਾ। ਤਾਹੀਂ ਅਸੀਂ ਇਹ ਕਹਾਵਤ ਬੋਲਦੇ ਹਾਂ:-

ਹਿੰਮਤ ਏ ਮਰਦਾਂ, ਮਦਦ ਏ ਖ਼ੁਦਾ

ਹਿੰਮਤੀ ਇਨਸਾਨ ਨਾ ਹੀ ਇਹ ਕਹਿੰਦੇ ਹਨ ਤੇ ਨਾ ਹੀ ਇਹ ਸੋਚਦੇ ਹਨ ਕਿ ਆਹ ਕੰਮ ਫਿਰ ਕਰਾਂਗੇ। ਸਿਆਣੇ ਵੀ ਕਹਿੰਦੇ ਹਨ ਕਿ ਜਾਂ ਹੁਣ ਜਾਂ ਫਿਰ ਕਦੇ ਨਹੀਂ।

ਵੀਹ ਸੌ ਪੰਝੀ ਦਸਤਕ ਦੇ ਚੁੱਕਾ ਹੈ। ਆਉ ਸਾਰੇ ਇਸ ਨਵੇਂ ਵਰ੍ਹੇ ਦਾ ਸਵਾਗਤ ਕਰੀਏ ਅਤੇ ਆਪਣੇ ਅੰਦਰ ਨਵੀਂ ਤੇ ਸਾਕਾਰਾਤਮਕ ਊਰਜਾ ਭਰੀਏ। ਸਾਰੇ ਜ਼ਰੂਰੀ ਕੰਮਾਂ ਨੂੰ ਅੱਜ ਹੀ ਕਰੀਏ। ਕਿਸੇ ਕੰਮ ਨੂੰ ਕੱਲ੍ਹ 'ਤੇ ਛੱਡਣ ਨਾਲ਼ ਸਾਡੇ ਅੰਦਰ ਬਣਿਆ ਉਹ ਜੋਸ਼ ਅਗਲੇ ਦਿਨ ਤੱਕ ਮੱਠਾ ਪੈ ਜਾਂਦਾ ਹੈ ਸੋ ਆਪਣੇ ਅੰਦਰ ਭਰੀ ਹਿੰਮਤ ਤੇ ਸ਼ਕਤੀ ਦਾ ਸਮੇਂ ਸਿਰ ਅਤੇ ਸਹੀ ਇਸਤੇਮਾਲ ਕਰਨ ਨਾਲ਼ ਸਾਡਾ ਹਰ ਦਿਨ ਇੱਕ ਨਵਾਂ ਸਾਲ ਹੀ ਹੋਵੇਗਾ।